Ynglŷn â Sustrans
Fyddwch chi byth yn meddwl sut fyddai bywyd pe byddem yn teithio mewn ffyrdd a fyddai mewn gwirionedd yn gwella ein hiechyd a’r amgylchedd? Byddai gennym ffyrdd diogel, aer glanach a gwell ansawdd bywyd. Sustrans yw prif elusen trafnidiaeth gynaliadwy y DU. Bob dydd rydym yn gweithio i gael atebion ymarferol a llawn dychymyg ar gyfer yr heriau trafnidiaeth sy’n effeithio ar bob un ohonom.
Ond beth yw trafnidiaeth gynaliadwy? Yn y bôn, er mwyn i fodd o drafnidiaeth fod yn gynaliadwy rhaid iddo fodoli o fewn adnoddau’r blaned er mwyn creu'r adnoddau sydd eu hangen i greu a gyrru pob math o drafnidiaeth, ac amsugno’r gwastraff a ddaw yn sgil eu creu a’u defnyddio.
Ar hyn o bryd mae’r modd yr ydym yn teithio yn defnyddio llawer iawn o un o adnoddau naturiol mwyaf gwerthfawr y byd - olew. Mae llosgi’r olew hwnnw at ddibenion teithio yn creu llawer o wastraff, yn cynnwys llygredd a CO2, un o’r nwyon tŷ gwydr sy’n gyfrifol am newid hinsawdd.
Rhaid i ni hefyd ystyried ein hiechyd. Gallwn deithio pellteroedd anferthol heb hyd yn oed symud, ac mae ein ffyrdd eisteddog o fyw yn effeithio ar ein hiechyd a’n lles. Mae bron i chwarter yr oedolion yn y DU yn ordew, ac mae 27% o ferched a 24% o fechgyn 11-16 oed hefyd yn ordew.
Beicio, ac yn arbennig cerdded, yw’r ffyrdd mwyaf cynaliadwy o deithio. Ychydig iawn o adnoddau’r blaned a ddefnyddir a bwyd yw’r ffynhonnell tanwydd sydd ei angen ar y ddau ddull.
Ond a yw beicio a cherdded yn ddewis mewn gwirionedd yn ein bywydau bob dydd? Pan fyddwch yn ystyried bod chwarter yr holl siwrneiau a wneir mewn car dan 2 milltir o hyd, ydy yw’r ateb. Gellid cerdded neu feicio llawer o'r siwrneiau byr hyn. Meddyliwch am y daith i'r ysgol – ychydig dros 3 milltir ar gyfartaledd yw hyd y daith i’r ysgol, ond mae beicio'r pellter hwnnw yn cymryd llai na hanner awr. Ac mae plant yn torri’u boliau i gael beicio i’r ysgol - byddai 31% yn hoffi gwneud hynny, ond dim ond 1% sydd yn gwneud.
Felly mae Sustrans wedi mynd ati i greu amgylchedd a fydd mewn gwirionedd yn cynorthwyo pobl i gerdded a beicio llawer mwy. Dyna i chi’r Rhwydwaith Beicio Cenedlaethol sy’n gymysgedd o strydoedd gyda thraffig wedi ei dawelu, ffyrdd tawel a llwybrau di-draffig mewn cymunedau ym mhob rhan o’r DU, yn helpu pobl i gyrraedd y gwaith, y siopau, yr ysgol ac i chwarae.
Mae’r cynlluniau Llwybrau Diogel i'r Ysgol a Bike It, y ddau yn gynlluniau Sustrans, yn gweithio gydag ysgolion a phlant i roi’r annibyniaeth y maent yn dyheu amdano fel y gallant gyrraedd yr ysgol ar feic neu ar droed a hefyd roi tawelwch meddwl i rieni fel y gallant adael iddynt deithio i’r ysgol yn y modd hwn.
Felly pam trafnidiaeth gynaliadwy? Oherwydd ein bod ni’n credu y dylai pawb gael y cyfle i deithio mewn ffyrdd sydd o fudd i’w hiechyd a’r amgylchedd.
I gael rhagor o wybodaeth, ewch i’n gwefan yn www.sustrans.org.uk
